Қызылордада жыл басынан бері 19 мүгедек жан жеке ісін ашуға несие алды

Аталып өткендей, Қызылорда облысы бойынша 27 мыңнан астам мүгедек бар. Олардың 4289-ы өкінішке орай 18 жасқа дейінгі балалардың үлесінде.  Мүмкіндігі шектеулі жандардың өмірін жеңілдету мақсатында қабылданған «Жол картасы» бойынша 2014-2015 жылдарға 8,1 миллиард теңге қаржы бөлінген. Сондай-ақ, бүгінгі таңда жұмыспен қамту орталықтары арқылы 354 мүмкіндігі шектеулі адамдар, оның ішінде 147 мүгедек тұрақты, 188 мүгедек уақытша жұмыспен қамтылды  және  19 мүгедек жан жеке ісін ашуға несие алды.

Айта кету керек, қазір облыстың барлық ауданында «әлеуметтік такси» қызмет етеді. Сондай-ақ, Қызылордаға жаңадан әкелінген 30 қоғамдық автобуста мүгедектердің мініп-түсуіне жағдай жасалған. Алдағы уақытта осындай 100-ге жуық автобус алынады. Өткен жылы мүгедектерге арналған 7 аула клубы ашылса, биылғы жылы алғаш рет Қармақшы, Сырдария және Жаңақорған аудандарында күндізгі болу бөлімшелер желісі ашылып, жұмыс жасауда.