Қызылордада мектепке дейінгі білім беру ұйымдарының республикалық форумы өтті (ФОТО)

Аймақ әкімдігінен хабарлағандай, оған ҚР Білім және ғылым вице-министрі Есенғазы Иманғалиев, «ЮНИСЕФ»  балалар  қорының өкілі және еліміздің түкпір-түкпірінен әдіскер, педагог мамандар қатысты.

Форумға арнайы келіп қатысқан ҚР Білім және ғылым вице-министрі Есенғазы Иманғалиев аймақтың мектепке дейінгі білім беру ұйымдарының жұмысына оң бағасын берді. «Қазірдің өзінде Қызылорда облысының бүлдіршендерді балабақшамен қамту көрсеткіші 92,2 пайызды құрайды. Бұл көрсеткіш жыл соңына дейін 100 пайызға жеткізіліп, «Балапан» мемлекеттік бағдарламасын уақытынан бұрын аяқтау жоспарланып отыр», - деп атап өтті ол.

Қызылорда облысы әкімінің орынбасары Рауан Кенжеханұлы «Балапан» бағдарламасы мемлекеттік-жеке меншік серіктестікті жүзеге асырудың тиімді жолы екенін айтты.  «Мектепке дейінгі мекемелердің оқыту, тәрбиелу әдістеріне де көп көңіл бөліп келеміз. Олардың материалдық-техникалық базасын нығайту үшін де біршама жұмыстар атқарылды. Биылдың өзінде 200 балабақшаға «Мантессори» әдісімен оқытуға қажетті құрал-жабдықтар алып берілді. Яғни, тәрбие мен оқыту жүйесіндегі жаңашылдыққа бетбұрыс қарқын алуда», - деді Р.Кенжеханұлы.

Сондай-ақ, «Шұғыла» балабақшалар желісінің құрылтайшысы Сейітқали Алшынбаев жеке меншік балабақша ашудағы өз тәжірибесімен бөлісті. Осы уақытқа дейін өз қаржысына 360, 320, 180 орындық үш балабақша ашқан кәсіпкер балабақшадағы орын тапшылығы мәселесін шешуге өз үлесін қосып, жас мамандардың жұмыспен қамтылуына және «Балапан» бағдарламасының жүзеге асырылуына ықпал етіп келеді.

Жалпы, форум қатысушылар жекеменшік балабақшалар жүйесін жетілдіру арқылы шағын және орта бизнесті дамыту, балабақшаларды салуда архитектуралық шешімдер мен мектепке дейінгі білім беру жүйесі қызметтерін автоматтандыру мәселелерін талқылады. Сондай-ақ, олар облыс орталығындағы бірқатар балабақшалардың жұмысын көріп, тәжірибе  алмасты.