Жамбыл облысында үздік тауар өндірушілер анықталды
12 Тамыз, 2015 18:13
Жамбыл облысында «Қазақстанның үздік тауары – 2015» көрме-байқауының жеңімпазы анықталды, сайысқа аймақтың 53 тауар өндірушісі қатысты, деп хабарлады «Атамекен»ҚР ҰКП баспасөз қызметі.
Сайысқа қатысушылар «Өндірістік мақсаттағы үздік тауар», «Халық үшін үздік тауар», «Үздік азық-түлік тауары» атты үш номинация бойынша бақ сынады.
Сонымен, «Өндірістік мақсаттағы үздік тауар» номинациясында жеңіс тұғырынан «Қазфосфат»ЖШС көрінді, екінші орынды «Ғимарат Темір Бетон»ЖШС иеленсе, қола«ACIG»ЖШС бұйырды.
«Арайстроймаркет-2003» ЖШС өнімі «Халық үшін үздік тауар» атанды, сонымен қатар екінші және үшінші орынды «Энерджи-Тараз»ЖШС мен «Жасулан-флора»ЖШС өзара бөлісті.
«Үздік азық-түлік тауары» номинациясында бірінші орынды «Та-Мак»ЖШС жеңіп алды, «күміс» «Бурненская молочная компания» ЖШС бұйырса, үздік үштікті «Аханов» ЖК қорытындылады.
Жеңімпаздарға дипломдар мен кубок берілді, қалған қатысушылар алғыс хаттармен марапатталды.
