Ш.Исмаилов: Қазақстан мен Қырғызстанның шекарасын ашу екі елдің экономикасын нығайтады
12 Тамыз, 2015 16:47
Қазақстан мен Қырғызстанның шекарасын ашу екі елдің экономикасын нығайтады, деп хабарлады «Қырғызстан - Астана» этномәдени қоғамдық бірлестігінің төрағасы Шавкат Исмаилов «Strategy2050.kz» АА берген эксклюзивті сұхбатында.
«Бүгін Қазақстан мен Қырғызстанның шекарасының ашылу салтанаты өтті. Менің ойымша, бұл қос елдің экономикасының дамуына үлкен серпін береді. Жаңа серіктестер, өткізу нарықтары, инвестициялар пайда болады», - деді Ш.Исмаилов.
Оның айтуынша, ерте заманнан бері екі ағайынды халықтар бейбітшілік пен келісімде өмір сүріп келеді және осы байланыс халықтар достығын нығайтады.
«Шекара маңындағы аудандар үшін айтарлықтай жеңіл болады. Жалпы шекараның ашылуы қандай жағдайда болмасын өте тиімді», - деп толықтырды ол.
Естеріңізге сала кетейік, Қазақстан мен Қырғызстанның шекарасындағы кедендік бақылау Қырғыз Республикасының Еуразиялық экономикалық одаққа қосылуы туралы шарт ережелері негізінде доғарылды.
Ботагөз Айтжанова
