• Басты
  • Қызылорда облысында жаңа оқу жылының алдағы міндеттері талқыланды

Қызылорда облысында жаңа оқу жылының алдағы міндеттері талқыланды

12 Тамыз, 2015 17:21
Қызылорда облысы Жаңақорған ауданында ұстаздардың дәстүрлі Тамыз кеңесі өтті, деп хабарлады аудан әкімінің баспасөз қызметі.

Алқалы жиында өткен оқу жылының жұмыс қорытындылары баяндалып, алдағы міндеттер талқыланды. 

Аудандық білім беру бөлімінің басшысы Болат Ибрагимовтың айтуынша, жаңа оқу жылын ауданымыз 15 мыңнан астам оқушы мен 42 жалпы білім беретін, 99 мектепке дейінгі ұйым, 3 мектептен тыс мекеме, 1 жалпы білім беретін кешкі мектеп, 1 жазғы тынығу лагерімен бастағалы отыр. Соңғы 3 жылда ауданда 10 мектеп жаңадан пайдалануға берілген. Ал, апаттық жағдайдағы Талап бекетіндегі №254 негізгі мектепке 100 орындық жаңа мектеп құрылысы салынуда. Жаңа білім ордасы 2015 жылдың желтоқсан айында пайдалануға берілмекші.
«2014-2015 оқу жылының 1-ші қыркүйегінен бастап-сынып оқитын 1929 оқушы және 2-сынып оқитын 1548 оқушы 100 пайызға тегін ыстық тамақпен қамтылған», - деп атап өтті ол.  

Ал, «Балапан» бағдарламасы аясында мектепке дейінгі ұйымдар саны жылдан- жылға артуда. Мысалы: 2014 жылы жалпы аудан бойынша 82 мектепке дейінгі ұйым жұмыс жасаса, 2015 жылы бұл көрсеткіш 99-ға жеткен.

Аудан әкімдігінің баспасөз қызметінен хабарлағандай, биылғы Ұлттық бірыңғай тестілеуге 880 мектеп бітірушінің 519-ы қатысып, нәтижесінде ауданның орта балы 81,6 құраған. Бұл өткен жылмен салыстырғанда 13,1 пайызға артқан деген сөз. Алтын белгіге ұсынылған 14 бітірушінің 10-ы өз білімдерін қорғап шыққан.

Барлық жаңалықтар