Алдағы маусымда ШҚО-да футбол клубтары біріктіріледі
12 Тамыз, 2015 20:39
Жаңа маусымнан бастап, Өскемен қ. «Восток» және Семей қ. «Спартак» футбол клубтары біріктіріліп, жаңадан «Алтай» клубы құрылады, деп хабарлады ШҚО-ның Ақпараттық орталығы.
Аталып өткендей, қазіргі маусымды ойнап біткеннен кейін, екі клуб біріктіріліп дене шынықтыру және спорт басқармасының қарамағына көшеді.
«Біріктіру барысында басшылар құрамы, команда құрамасы ауысып, оқу-жаттығу өткізуде отандық және шетелдік мамандар тартылады. Біздің ойымызша, жаңа клуб өзінің жанкүйерлерін жаңа жетістіктерімен қуанта алады», – деді басқарма басшысы Елдос Чикенов.
Айта кетерлік жайт, «Восток» футбол клубы жабылып қалмайды. Клуб қарамағында құрылып жатқан академия құрамынан жаңа команда құрылып, жас ойыншылар «Алтай» футбол клубының тәжірибесі бойынша жаттығады.
