Павлодар облысында 70 білім беру нысанына 853,4 млн теңгеге күрделі жөндеу жұмыстары жүргізіледі

Облыстық білім беру басқармасының ақпары бойынша, биылғы жылы 70 білім беру нысанында күрделі жөндеу жұмыстары жүріп жатыр. Олардың ішінде 22-сі – «Жұмыспен қамту жол картасы-2020» бағдарламасы шеңберінде, ал 48-і- жергілікті бюджет есебінен. Барлығы 9 балабақша, 58 мектеп және басқа типтегі 3 мекемені күрделі жөндеуден өткізу жоспарланған.

Білім беру ошақтарын жөндеуге 853,4 млн. теңге бөлінген, оның ішінде «Жұмыспен қамту жол картасы-2020» бағдарламасы бойынша – 498,1 млн.теңге, жергілікті бюджет есебінен – 355,3 млн.теңге.

Айта кетерлік жайт, 8 білім беру мекемесінде «Жұмыспен қамту жол картасы-2020» бағдарламасы бойынша күрделі жөндеу жұмыстары аяқталды, 25 тамызға қарай тағы 8 нысандағы жұмыстар аяғын таппақ.  

Жергілікті бюджет есебінен күрделі жөндеу жүргізілген 48 нысанның 25-інде жұмыстар аяқталды, 15-інде жұмыстар кестеге сәйкес жүруде, олардың 10-ында жұмыстардың 80%-дан астамы атқарылған.

Биылғы жылы облыс мектептеріне 589 жас маман жолдама алды, 5 тамыздағы жағдай бойынша олардың 332-сі келіп жетті, жаңа оқу жылының басына дейін қалған мамандар жұмыс орындарына орналасады деп күтілуде.

Аймақтың білім беру ошақтарына 593 млн. теңге сомасына 773,3 мың дана оқулық толық көлемде жеткізілді.