Әлеуметтік төлемдер тағайындау жөнінде 9,4 мыңға жуық ауыл тұрғыны кеңес алды

11 Тамыз, 2015 15:19

2015 жылғы 16 наурыз бен 10 тамыз аралығында еліміздің шалғай елді мекендерінде тұратын 9389 азамат арнайы жұмылдыру топтарының құрамында ауылдарға барған Зейнетақы төлеу жөніндегі мемлекеттік орталығының, «Қазпошта» АҚ және халыққа қызмет көрсету орталықтары мамандарынан зейнетақы және жәрдемақы тағайындау жөнінде кеңестер алды.

ҚР ДСӘДМ баспасөз қызметінен хабарлағандай, Ауыл тұрғындарына мемлекеттік қызметтерді көрсету үшін аталған ұйымдардың 830 қызметкері жұмылдырылды. Атқарылған жұмыс қорытындысында жүгінген 9389 азаматтың 5773-сі түрлі әлеуметтік төлемдерді рәсімдеу бойынша кеңес алды, 1933 адамнан деректемелерді өзгерту жөнінде өтініштер қабылданды, 1683 ауыл тұрғыны зейнетақы және жәрдемақы тағайындауға құжаттарын тапсырды.

Аталып өткендей, ағымдағы жылғы 16 наурыз бен 10 тамыз аралығында жұмылдыру топтары еліміздің барлық өңірлерінде 2756 шалғай ауылдық округті қамтып, оларға 4349 рет барды.

«Зейнетақы және жәрдемақы тағайындау жөніндегі барлық өтініштер бойынша электрондық іс макеттері жасақталып, өкілетті органның қарауына жіберілді. Ағымдағы жылғы 10 тамыздағы жағдай бойынша 1653 өтініш берушіге зейнетақы және жәрдемақы тағайындалды. Зейнеткерлік куәліктер және хабарламалар азаматтарға жұмылдыру топтарының келесі сапарларында жеткізілетін болады, - делінген хабарламада.

Жұмылдыру топтарының жұмысы пилотты режимде жылдың соңына дейін созылады. Тұрғылықты жері бойынша қызмет алушыларға қызмет көрсету (құжаттарды қабылдау және шот ашу) мемлекеттік қызметті алу уақытын және шығындарды төмендетуді, қолайлылықты, оңайлатылған тәртіпті қамтамасыз етеді.

Барлық жаңалықтар