ҚР-да 2015 жылдың соңына қарай Қазақстан тарихы бойынша интернет желісінде 3D сапарлар ашылады

11 Тамыз, 2015 12:14

«Менің елім» ұлттық жобасын жүзеге асыру аясында Қазақстанда жоғары технологиялық танымдық «Қазақстан энциклопедиясы» веб-порталы ашылады, деп ағынан жарылды «Саясаттанушылар конгресі» қоғамдық бірлестігінің төрайымы, Еуразиялық интеграция институының директоры Жанаргүл Құсманғалиева ОКҚ-да өткен баспасөз конференциясында.

«Бұл порталда 3D нұсқадағы сапарларды тамашалауға болады, яғни олар - Қазақстан бойынша виртуалды турлар. Сонымен қатар, онда Қазақстан тарихы мен мәдениеті жөнінде ақпарат, қызықты фактілер, анықтамалық географиялық деректер қамтылады», - деді институт директоры.

Оның пайымынша, «Қазақстан энциклопедиясы» порталы адамдар тарапынан зор қызығушылыққа ие болады. Онда қазақстандықтар мен туристер сайтқа кіріп, еліміз туралы қызықты ақпараттармен танысуға мүмкіндік алады.

«Жоба жылдың соңына дейін іске қосылады деп жоспарлап отырмыз. Әрине, желіде осындай көптеген түрлі жобалар бар, бірақ олардағы 3D сапарлар толық қамтылмаған. Бұл сайтта Қазақстан туралы барша ақпарат жинақталады және осында соңғы буынды технологияларды ескере отырып, инновациялық қадамдар пайдаланылады», - деп түйді Жанаргүл Құсманғалиева.

Барлық жаңалықтар