ҚР Президенті Н.Назарбаев Астанадағы жаңа Мұз сарайында болды (ФОТО)

«Бүгін біз тағы бір әлеуметтік маңызды нысанның іске қосылуын атап өтудеміз. Осы шыныменда мұз сарайы деп атауға болады. Олимпиадалық масштабтағы 12 мың көрерменге арналған стадион және мұз айдыны, оған қоса Хоккей академиясы, 50 метрлік бассейн, яғни мұнда барлық кешен орналасқан. Астана еліміздің суық аймағында орналасқан қала. Мұндағы қыс суық, әрі ұзақ, сондықтан қысқы спорт түрлеріне көбірек көңіл бөлуге болады», – деді Н. Назарбаев.

Елбасы атап өткендей, бұл мұз айдының іске қосу арқылы, мұнда халықаралық деңгейдегі ірі жарыстарды өткізу арқылы оның шығынын ақтап алуға да болады.

«Бұл ғимаратты елімізге, Астанамызға үлкен сыйлық деп санауымыз керек. Бүгінде еліміздің көптеген облыстарында хоккей стадиондары бар, ал ҚХЛ-дағы қазақстандық команда жақсы орында келе жатыр. Бұл өте жақсы көрсеткіштер. Менің ойымша, осы  стадион біздің спортшыларға жаңа серпін береді. Біз осында әлемдік танымал командаларды қабылдайтын боламыз. Сондықтан мен спортшылар мен жастарға құттықтауымды жеткізгім келеді»,-деді Елбасы.

Анар Тәңірқұлова

Суретке түсірген Азамат  Әлиев