Қазақстан «Танк биатлоны-2015» сайысының көшбасшылар үштігінде (ФОТО)

7 Тамыз, 2015 10:39

Алабино полигонында «Танк биатлоны» экипаждары жеке сайыстарының қорытындысы шығарылды, сондай-ақ жарыстың жартылай финалында күресті жалғастыратын сегіз команданың аты аталды. Сонымен, жеке және жалпы командалық есепте үздіктер үштігінде Қазақстан, Ресей және Қытай танкішілері, деп хабарлады ҚР ҚМ баспасөз қызметі.

Аталып өткендей, Үндістан мен Армения төртінші және бесінші орында. Сегіздікті Сербия, Қырғызстан және Тәжікстан жабады. Кувейт, Моңғолия, Венесуэла, Ангола мен Никарагуа «Танк биатлонынан» шығып кетті.

«Қазақстан командасының шеберлігі анағұрлым шыңдалған. Нәтижелер өте жақсы. Өткен жылмен салыстырғанда бәсекелестік күшейген. Ойындар өте сәтті. Бұл машиналар мен экипаждардың сайысы ғана емес, бұл елдер арасындағы достастық», - деді РФ ҚК Құрлық әскерлерінің бас қолбасшысы генерал-полковник Олег Салюков.

Жеке жарыстың басынан бастап «Танк биатлонындағы» негізгі күрес Қазақстан мен Ресей арасында өрістетілді. Екі елдің экипаждары теңбе-тең келе жатты. Командаларды бірнеше ұпай ғана бөліп тұрды.

Енді танкішілерімізге соңғы «Эстафета» кезеңінде сәтті өнер көрсетіп, шешуші кезеңге сытылып шығу қажет. Онда мықты командалардың ішінен «Танк биатлоны-2015» жарысының бір жеңімпазы анықталады.

Барлық жаңалықтар