ИИДМБ: ОҚО-да екі шағын зауыт пен балықты қайта өңдеу цехы салынуда

ОҚО-да 27 тауарлы-балық шаруашылығы құрылатын болады. Алдағы үш жылда балық өңдеу көрсеткішін 3 800-ден 8 мың тоннаға дейін ұлғайтып, дайын өнімді Еуропаға жөнелту жоспарлануда. Биылғы жылы «Максимум» жобасын жүзеге асыру үшін 400 млн теңге қарастырылған. 2016-2017 жылдары қосымша 1 млрд теңге бөлінетін болады. 

«Аталған бизнес түрімен айналысқысы келетін әрбір кәсіпкер жеңілдікпен 5 жылға несие ала алады. Ал, келесі жылдан бастап, балық өнімдері бағасын төмендету үшін облыстық бюджеттен субсидияларды төлеу үшін 300 млн теңге бөлінеді. Аталған шаралар балық шаруашылығын дамытуға жаңа серпін береді»,-деді облыс  әкімінің орынбасары С.Тұяқбаев. 

Шардара ауданында екі балықты қайта өңдеу зауыты мен балық өңдеу цехы жұмыс істейді. Олар «Хамит» ӘКК-сы мен «Шардара-1». Бұл кәсіпорындар өткен жылы 3 мың 600 тонна өнім өндірді. ИИДМБ аясында екі шағын зауыт пен балықты қайта өңдейтін цех салынуда. Олар іске қосылған жағдайда қосымша 700 тонна балық өнімдері өндіріліп, 85 жұмыс орнын ашуға мүмкіндік туады. Бүгінде осы салада жұмыс істейтін кәсіпкерлер ілкі жоба ретінде Шардара су қоймасы мен тоғандарда балық өңдеуде.