ХОК Президенті К.Мәсімовке олимпиада құндылықтарын дамытуға қосқан үлесі үшін диплом табыстады
31 Шілде, 2015 11:19
ХОК Президенті Томас Бах Алматының таныстырылымын жоғары бағалап, Қазақстан Премьер-министрі, Алматы-2022 Өтінім комитетінің төрағасы Кәрім Мәсімовке XXIV қысқы Олимпиада ойындары мен XIII Паралимпиада ойындарын өткізуге қазақстандық өтінімді таныстыру кезінде Қазақстанның олимпиада құндылықтарын дамытуға қосқан үлесі үшін диплом табыстады.
«Қазақстан өзінің жетістіктерімен мақтана алады. Сіздер өз өтінімдеріңізбен әлемдегі миллиондаған жанкүйерлер мен спортшыларды шабыттандырып отырсыздар. Мен сізге Қазақстан 2020 жылғы Олимпиаданың күн тәртібіне қосылып, олимпиада құндылықтарын дамытқаны үшін диплом табыстаймын», - деді Томас Бах.
Сонымен қатар Монако ханзадасы Альберт II Алматыдағы спорт нысандарының құрылыс барысына қызығушылық танытты.
Алматы-2022 комитеті төрағасының орынбасары Андрей Крюков Алматының жоспарлары туралы әңгімелеп берді.
«2017 жылы бізде Универсиада өтеді, қазір бізге 4 нысан салу керек, екеуі салынып жатыр, 2016 жылы аяқталады, олар 70% дайын. Біз шана спорты және шорт рек, мәнерлеп сырғанау үшін тағы екі нысан саламыз», - деп атап өтті ол.
