Ақтөбе облысында Ұлт жоспарының 4 бағытын іске асыру мәселелері қаралды

Шараға облыс басшылығы, бес институционалды реформалардың жүзеге асырылуын қадағалайтын Президент жанындағы Ұлттық комиссиясы жұмыс тобының мүшесі, ҚР Мәдениет және спорт министрлігінің Дін істер комитеті төрағасының орынбасары Бахытжан Кеңесұлы Кулекеев, ұлттық-мәдени орталықтардың, үкіметтік емес, жастар ұйымдарының, саяси партиялар, зиялы қауым, БАҚ өкілдері қатысты.

Қазіргі кезде Мемлекет басшысының тапсырмасымен 5 институционалдық реформаларды жүзеге асыру жұмыстарын үйлестіру мақсатында Президент жанынан Ұлттық комиссия құрылып, тиісті жұмыстар орталықпен қатар өңірлерде де қарқынды түрде жүргізілуде.

Ақтөбе облысы әкімінің өкіміне сәйкес, «Ұлт жоспары: 100 нақты қадамды» ақпараттық сүйемелдеуді ұйымдастыру жөніндегі жұмыс топтары құрылып, құжатты ақпараттық сүйемелдеу, түсіндіру-насихаттау бойынша жұмыстар жасалуда. Аталған жұмыс тобына мемлекеттік орган басшылары, депутаттар, зиялы қауым өкілдері, үкіметтік емес ұйымдар мен саяси партиялардың жетекшілері енді.

Шара барысында қатысушылар тарапынан «Мәңгілік ел» патриоттық акті жобасын, Қазақстан халқы Ассамблеясының «үлкен ел – үлкен отбасы» кең көлемді жобасын , Жалпыға Ортақ Еңбек Қоғамы идеясын алға жылжыту жөніндегі ұлттық жобаны  жүзеге асыру  бойынша бірқатар пікірлер мен ұсыныстар айтылды.