Қазақстанның жас спортшылары Лос-Анжелесте еліміздің намысын қорғайды

21 Шілде, 2015 20:27

АҚШ-тың Лос-Анджелес қаласында өтетін Бүкіләлемдік жаздық арнайы Олимпиадалық ойындарына Алматы облысынан 4 спортшы қатысады, деп хабарлады облыс әкімдігі.

«Спортшылар Артем Ломакин, Назым Манкеева, Саин Сералинов, Кристина Турдиева - «Қамқор» балаларға арналған психоневрологиялық интернат үйінің тәрбиеленушілері», - делінген хабарламада.

Олар 2015 жылдың 21 шілде - 3 тамыз аралығында Лос-Анджелес қаласындағы Спорттық ойындарға жеңіл атлетика бойынша қатыспақ. Мекеме директоры Елена Константиновна Нам бстап келген делегацияға Махаббат Бигелдиев сәттілік тілеп, алдағы жарыстардан жеңіспен оралуларына тілектестік білдіріп, спортшы балаларға естелік сыйлықтар берді.

Бұған дейін қамқорлықтар еліміздегі жарыстармен қатар Оңтүстік Кореяның ПхенгЧанг қаласында өткен Бүкіләлемдік Қыстық Арнайы Олимпиадалық ойындарында шаңғы жарысына, Бельгияның Антверпен қаласындағы Жаздық Арнайы Олимпиадалық ойындарда жеңіл атлетика жарысына қатысқан. Бүгінгі күні Балалар үйінің қоржынында 8 алтын, 10 күміс, 3 қола медаль бар.

Қазақстан құрамасының 72 спортшысы Бүкіләлемдік жаздық арнайы Олимпиадалық ойындарында спорттық жарыстың 15 түрінен бақ сынаспақ.