Алматы облысында Қазақ хандығының 550 жылдығына арналған ұлттық ат спортынан жарыс өтті

21 Шілде, 2015 20:43

Қазақ хандығының 550 жылдығы аясында Жамбыл ауданында екі күндік арнайы мерекелік шаралар ұйымдастырылды. Ауданның орталық алаңында гала-концерт, «Көкбастау» ипподромында ұлттық ат спортынан жарыстар өткізілді, деп хабарлады облыс әкімдігі.

«Гала-концертте Сүйінбай атындағы облыстық филармонияның әртістері мен Қазақстан эстрадасының жұлдыздары қатысты.«Көкбастаудағы» ат жарысы да ән-жырмен басталды. Жиналған қауымды облыс әкімінің орынбасары Ғалымжан Әбдірайымов құттықтап, жарысқа қатысушыларға сәттілік тіледі. Жарыс барысында қыз қуу, теңге ілу, аударыспақ, көкпар сияқты қазақтың ұлттық ойындары көрсетілді», - делінген хабарламада.

Бәйге қорытындысында тайжарыстан Ескелді ауданының шабандозы Ақылбай Ақбердинов бірінші келді. 11 шақырымдық құнан бәйгеде Жамбыл ауданынан келген Қойшыбай есімді шабандоздың тұлпары алдына қара салмады. Жамбыл ауданының тұрғыны Ұлан Омаров баптаған Шаухартас есімді тұлпар топ бәйгенің жеңімпазы атанды. Олардың барлығына да жеңіл автокөлік берілді.

Ең негізгі 25 шақырымдық аламан бәйгеде Ескелді ауданының тұрғыны Ақылбай Ақберлиновтің Тайтұяғы мәре сызығын бірінші кесіп, шабандоз бала Олжастың қолына жеңіл автокөліктің кілті берілді.

Осы бәйгенің екінші және үшінші орын иелеріне де жеңіл автокөліктер мен ақшалай сыйлықтар ұсынылды.