Мәжіліс депутаттары БҚО-да заң жобалары бойынша түсіндіру жұмыстарын жүргізуде

21 Шілде, 2015 12:36

Парламент Мәжілісінің депутаттары БҚО-да сайлаушылармен кездесіп, өңірдің өнеркәсіп кәсіпорындарын аралауда. Ондағы мақсат – мемлекеттік бағдарламалардың жергілікті жерлерде жүзеге асырылу барысымен танысу, Мемлекет басшысы алдыға қойған міндеттерді өміршең ету, деп хабарлайды облыс әкімдігінің баспасөз қызметі.

Депутаттар Елена Тарасенко, Шавхат Өтемісов, Самиғолла Оразов пен Виктор Киянский аралап көрген осындай нысандардың бірі «Жастық» сүт кешені болды. Бұл нан-сүт өнімдерін өндіретін комбинаттың бір бөлігі болып табылады және ол қазір жергілікті тұрғындар үшін қажетті тәтті нан, кондитерлік өнімдер, айран, сүт, кілегей, майлардың түрлерін өндіруде. Мұнда 30 адам жұмыспен қамтылған.

Орал нан-сүт кәсіпорнының бас директоры Хамзат Исаевтың айтуынша, кәсіпорының басты құндылығы оның өнімдерінің табиғилығында болып отыр. Кәсіпорын қандай да бір тұнбалар мен қоспаларды пайдаланбайды. Шикізат мұнда жақын ауылдардан әкелінеді, сүт жинау жұмысы жолға қойылған, тәулігіне кәсіпорын 2,5 тонна сүт өнімдерін шығарады. Депутаттар аталмыш кәсіпорын өкілдеріне шығындардың жартысына жуығына өтемақы беретін «Агробизнес-2020» бағдаралмасына қатысуға шақырды.

Депутаттар Орал трансформаторлық зауыты мен «Родник» ЖШС-да да болды. «Біздің міндетіміз билік пен бизнестің қалай әрекет етіп жатқандығын білу, оларға консультативті көмектер көрсетіліп жатыр ма, түсіндіру жұмыстары қалай жүргізілуде, халық шаруашылығын дамытуда маңызды болып табылатын мемлекеттік бағдарламалар жергілікті жерлерде қалай жүзеге асырылуда деген мәселелермен жан-жақты танысу»,-деді Мәжіліс депутаты Елена Тарасенко.

Айта кететін мәселе, депуттар облыста 10 күн болып, Мәжілісте есепті кезеңде қаралған заң жобалары бойынша түсіндіру жұмыстарын жүргізеді.