Биыл аралдықтар көгілдір отынды пайдалану мүмкіндігіне ие болады

20 Шілде, 2015 20:03

Арал қаласына жүргізіліп жатқан автоматтандырылған газ тарату станциясы мен квартішілік жоғарғы, орташа, газ реттеуіш пунктерінің, газ таратушы шкафтарының құрылыстары өз мәресіне жетіп қалды, деп хабарлады облыс әкімдігі.

«Тура бір ай бұрын Арал қаласындағы жеке тұрғын үйлерді, кәсіпкерлік субъектілердің нысандары мен тағы да басқа объектілерді газ желісіне қосу мақсатында өтініштер қабылдау басталып, қазіргі таңда 40 тұрғын үйге газ құбыры мен қондырғылары монтаждалды. Өтініш бергендердің саны 400-ге жақындады», - делінген хабарламада.

Жеке тұрғын үйлерді газдандыру мәселесіне келетін болсақ, өтінішпен қоса құжаттарды тапсырғаннан кейін, бірінші кезекте монтаждау жұмыстарын жүргізу қажет. Бекітілген есептемелерге сәйкес, тұрғын үйді газдандыру орта есеппен 25 метр газ құбырына материалдарын, жұмыстары мен қызметтерін қоса есептегенде ҚҚС-мен 134235 теңгені құрайды. Егер жоба бойынша үйге тартылатын газ құбырының ұзындығы 25 метрден аз болса, монтаждың құны азаяды, ал мысалы, құбыр ұзындығы 30 немесе 40 метр құраса, тиісінше баға да өседі.

Газ есептегіш құралының бағасы ҚҚС-мен 9289 теңгеден басталады. Газдандыру пешінің бағасы тұрғын үйдің көлеміне байланысты 80872 теңгеден басталады. Сонда 25 метрлік газ құбыры жүргізілген, газ қондырғылары орнатылған орташа үйге 224396 теңге қаржы жұмсалады. Сонымен қатар, отбасының, мекеме-кәсіпорын ұжымдарының қауіпсіздігі үшін газ дабылқаққыш қондырғысын алып, орнатуы міндетті.

Барлық жаңалықтар