5 айда қайта өңдеу өнеркәсібіне салынған инвестициялар көлемі 228 млрд теңге болды
20 Шілде, 2015 18:12
2015 жылдың қаңтар-мамыр айлары аралығында қайта өңдеу өнеркәсібі саласына салынған инвестициялар көлемі 228 млрд теңгеге жетті. Бұл өткен жылдың сәйкес мерзімімен салыстырғанда 11,6 млрд теңгеге көп. Аталмыш көрсеткіштер бойынша қазір топ бастап отырған аймақтар Павлодар мен Қарағанды облыстары, деп хабарлайды ranking.kz мониторинг агенттігі.
Хабарламада аталған екі аймақтың үлесіне осы салаға бөлінген инвестициялардың 58 пайызы тигендігі айтылған. Салыстырмалы алатын болсақ, 2014 жылдың қаңтар-мамыры аралығында аталмыш мәселе бойынша көрсеткіш 30 пайыз болған.
Биылғы жылдың 5 айында негізгі капиталға деген инвестиция көлемі Павлодар облысы бойынша 84,6 млрд теңгеге, Қарағанды облысы бойынша 48,1 млрд теңгеге жетті. «Жалпы алғанда, соңғы 5 жылда қайта өңдеуші кәсіпорындардың негізгі капиталға деген инвестициялар көлемі 120,9-дан 228,3 млрд теңгеге дейін артты»,-делінген хабарламада.
