Мәскеуде қазақстандық ғарышкерді ғарыштық ұшуға даярлау туралы келіссөздер өтті
17 Шілде, 2015 10:33
Қазақстан Республикасының Инвестициялар және даму министрлігі Аэроғарыш комитетінің (Қазғарыш) төрағасы Талғат Мұсабаев Мәскеу қаласындағы жұмыс сапары шеңберінде «Роскосмос» мемлекеттік корпорациясының басшысы Игорь Комаровпен кездесті, деп хабарлады Қазғарыштың баспасөз қызметі.
Аталып өткендей, келіссөздерде қазақстандық ғарышкерлікке кандидат Айдын Айымбетовтің алдағы ғарыштық ұшуға даярлығы туралы мәселе талқыланды, сондай-ақ А. Айымбетовтің қатысумен ғарыш экспедициясының жоспарлап отырған ғылыми тәжірибелерінің негізгі бағыттары қарастырылды.
Ғарыштық ұшулардың ұлттық ғылыми бағдарламасының әзірлеушілері – қазақстандық ғалымдар тобын «Ұлттық ғарыштық зерттеулер мен технологиялар орталығы» акционерлік қоғамының президенті, профессор Жұмабек Жантаев басқарды.
