Жаңа еңбекақы төлеу жүйесі мемлекеттік қызметтің тартымдылығын арттырады – Өтешов

16 Шілде, 2015 14:32

Мемлекеттік қызметкерлердің жалақыларын факторлы-балдық шек негізінде төлеу осы қызметтің тартымдылығын арттыратын болады, деді Мемлекеттік қызмет істері және сыбайлас жемқорлыққа қарсы іс-қимыл агенттігінің Павлодар облыстық департаменті жетекшісінің орынбасары Мақсат Өтешов ОКҚ-де өткен баспасөз мәслихатында.

«Бүгінде мемлекеттік қызметкерлердің жеке сектордағы қызметкерлерден әлдеқайда төмен жалақы алатындығы белгілі. Алайда, мемлекеттік қызметкерлерде жауапкершілік өте үлкен. Сонымен қатар, еңбекақы төлеу жүйесі оларға түсірілетін салмақ пен жұмыс көлеміне сәйкес келе бермейді. Мемлекеттік қызметтердің басым бөлігі аудандық деңгейде жүзеге асырылады. Еңбек ауыртпалығы барлығына бірдей бөлінбейді. Көп жағдайда бір қызметкерге көптеген қызметтер бойынша жауапкершілік артылады»,-деді М.Өтешов.

Ал енгізілгелі отырған факторлы-балдық шек аталған мәселелерді шешуге бағытталған және ол әсіресе, еліміздің аймақтарында мемлекеттік қызметтің тартымдылығына ықпал ететін болады.

«Атқарған ісіңе қарай еңбекақы алу өте маңызды. Сондай-ақ кадрге деген зәрулік ұлғайып тұрған кезде ғылыми негізделген, әділетті еңбекақының болуы жергілікті жерлердегі мемлекеттің қызметтің тартымдылығын арттыратыны сөзсіз»,-деді ол.

Бұған қоса, штат саны мен әкімшілік шығындарды оңтайландыру ісінің жетекшілердің өздерінің құзырына беру, басшылардың менеджерлік қасиеттерін шыңдап, сол арқылы барынша шағын және жинақы аппаратты жасақтауға мүмкіндік береді.

Анар Тәңірқұлова

Барлық жаңалықтар