«Достастық жауынгері» халықаралық байқауына қатысу үшін іріктеу кезеңінен 17 әскери қызметші өтті (Фото)

16 Шілде, 2015 14:48

«Отар» 40-ншы әскери базасында «Достастық жауынгері» халықаралық байқауына қатысушыларды іріктеу кезеңі аяқталды. Іріктеу төрт жарыс күнінен және бес негізгі кезеңнен тұрды, деп хабарлады Қорғаныс министрлігі.

Оның нәтижесі бойынша халықаралық байқауда Қазақстанның және армиямыздың намысын қорғайтын ең күшті, ең шыдамды және ең білімді деген әскери қызметшілер айқындалды. ҚР Қарулы Күштерінің ауқымында 4 топтан тұратын 17 әскери қызметші жеңімпаз атанды. Іріктеліп алынған әскери қызметшілердің арасынан ҚР ҚК тобы құралады.

Бір ай бойы тәжірибелі нұсқаушылардың басшылығымен күшейтілген даярлықтан өткен жауынгерлер «Достастық жауынгері» халықаралық байқауына қатысады. Байқау барысында әскери қызметшілер АРД кедергі сызығын игеруде, жалпы әскери қорғаныс кешенін киюде, суық қаруды лақтыруда, атыста, дене даярлығында өздерінің машықтанған дағдыларын көрсетті.

Қатысушылар АК-74 автоматымен жұмыс істеу ептілігін, сондай-ақ әскери тарих, ҰОС жылдарындағы кеңестік жауынгерлердің даңқты батырлығы мен жауынгерлік ерлігі, халықаралық гуманитарлық құқық нормалары туралы білімдерін танытты.

Достас армиялар әскери қызметшілерінің әскери-кәсіби шеберлігін көрсететін «Достастық жауынгері» халықаралық байқауы 2009 жылдан бастап ТМД қатысушы мемлекеттердің Қорғаныс министрлері кеңесінің шешімі бойынша жыл сайын өткізілетінін атап өткен жөн. Өткен жылдары байқау Ресей Федерациясы мен Беларусь Республикасының аумағында өткізілді. Қазақстандық әскери қызметшілер байқауға ұдайы қатысып, өздерінің жоғарғы жеке даярлық деңгейін көрсетеді және әрқашан жүлделі орындар иеленіп келеді.

Барлық жаңалықтар