Қызылордада фолейбол біріншілігінің үздіктері анықталды

16 Шілде, 2015 20:31

Қызылорда қаласында волейболдан балалар-жасөспірімдер спорт мектептерінің 2002-2003 жылдары туылған оқушылары арасында облыс біріншілігі өтті, деп хабарлады облыс әкімдігі.

«Облыстық дене шынықтыру және спорт басқармасының ұйымдастыруымен өткізілген жарысқа Қызылорда қаласы мен аудандардан 16 команда бақ сынап, 4 топқа бөлініп ойнады», - делінген хабарламада.

Бес күнге сызылған жарыс нәтижесінде ұлдар арасында №8 Жаңақорған ауданының спорт мектебі облыс біріншілігінің жеңімпазы атанды. Екінші орынды №9 Шиелі ауданының спорт мектебі иеленсе, №7 Жаңақорған ауданының спорт мектебі үшінші орынды еншіледі. Ал қыздар арасында №9 Шиелі ауданының спорт мектебі өздерінің мықтылықтарын көрсетті. Күміс жүлде №20 Арал ауданының спорт мектебіне тиесілі болса, қола жүлде №11 Сырдария ауданының спорт мектебіне бұйырды.

Жарыста «Үздік ойыншы» - Ақжелек Құрманова (№9 Шиелі спорт мектебі), Асхат Дәурен (№8 Жаңақорған спорт мектебі), «Үздік шабуылшы» - Бекарыс Еген (№9 Шиелі спорт мектебі), Аяулым Төлебаева (№20 Арал спорт мектебі), «Үздік үйлестіруші» - Берік Пернебай (№7 Жаңақорған спорт мектебі), Аружан Төлеуова (№11 Сырдария спорт мектебі) марапатталды. Сондай-ақ, үздік жаттықтырушы аталымына аралдық Саржан Сахиев ие болды.

Барлық жаңалықтар