• Басты
  • «Славян базары-2015» байқауының жеңімпазы ТМД елдерінің масс-медиа нарығына шығуды жоспарлауда

«Славян базары-2015» байқауының жеңімпазы ТМД елдерінің масс-медиа нарығына шығуды жоспарлауда

16 Шілде, 2015 11:32
«Славян базары-2015» байқауының Гран-при жүлдесін ұтып алған Димаш Құдайберген жақын арада ТМД елдерінің масс-медиа нарығына шығуды жоспарлап отыр. Бұл туралы ол ОКҚ-да өткен баспасөз конференциясында хабарлады.

«Шынымды айтсам бұл байқауға қатысу туралы бала кезімнен армандап келемін. Орайы келіп тұрғанда университетіміздің ректоры Айман Мусаходжаеваға қолдау көрсеткені үшін алғыс білдіргім келеді. Бүгінгі таңда бойындағы талантымен алысқа бара алмайсын, қолдау керек»,  деді Д. Құдайберген.

Жақын арада «Славян базары-2015» байқауының жеңімпазы ТМД елдерінің масс-медиа нарығына шығуды жоспарлап отыр.

«Болашақта біз Ресей, кейін ТМД елдерінің нарығында өз клиптерімізді көрсетсек деп едік. Өздеріңіз білетіндей «Славян базары» байқауы барлық ТМД елдерінде көрсетіледі. Бұл өте беделді байқау онда Beyonce, Валерий Леонтьев, Витас сынды жарық жұлдыздар өнер көрсетеді. Осы ретте жас әртіске осындай үлкен әртістермен бір сахнада өнер көрсету жоғары мәртебе»,  деді әнші.

Өз кезегінде Димаштың ұстазы, ҚазҰӨУ профессоры Майра Дәулетбак аталмыш байқаудың деңгейін жоғары бағалады.

«Байқаудың кәсіби деңгейі өте жоғары болды, конкурстанттар өте мықты. 21 мемлекеттен келген конкурстанттар байқауда бақ сынады, бәсеке өте жоғары болды. Алайда біздің Димаш оқ бойы озып шықты, біз оны мақтан тұтамыз»,  деді М. Дәулетбак.

Естеріңізге сала кетейік, Димаш Құдайберген екі күннің қорытындысы бойынша ең жоғары балл - 175 балл жинады.  Қазақстандық әнші Жазғы амфитеатр сахнасында бас жүлдені және арнайы «Лира» сыйлығына иеленген еді.

Айта кетерлік жайт, «Славян базары» байқауы 1992 жылдан бастап жыл сайын өткізіліп келеді.

Анар Тәңірқұлова

Барлық жаңалықтар