NADLoC ҚР ДСҰ-ға кіруіне орай кәсіпкерлерді қолдайды (БЕЙНЕ)

15 Шілде, 2015 18:32

Дүниежүзілік сауда ұйымына мүше мемлекеттердің ешқайсысы да өздерінің өнім өндірушілерінен бас тартқан жоқ, біз қарап, дайындап жатқан қолдау шаралары бар, деді «NADLoC» жергілікті қамтуды дамыту ұлттық агенттігі» акционерлік қоғамының басқарушы директоры Әділхан Арыстанов Strategy2050.kz ақпарат агенттігінің тілшісіне берген сұхбатында.

«Қазақстанның ДСҰ-ға кіруі біздің тауар өндірушілер үшін үлкен сын болмақ, алайда біздің агенттік қол қусырып отырған жоқ. Біз халықаралық тәжірибені зерттеудеміз, мәлімметтерге сәйкес, ДСҰ-ға мүше бірде-бір мемлекет өздерінің өнім өндірушілерінен бас тартқан жоқ. Біз қарап, дайындап жатқан қолдау шаралары бар, олар Қазақстанның өзіне алған келісімдеріне қайшы келмеуі керек»,-деді А.Арстанов.

Оның сөзінше, ДСҰ аясында келісімдер аясында 6 жылдық өтпелі кезең бар.

«Осы уақытта біздің кәсіпорындар ұмтылып, өздерінің тауарларының сапасын арттырулары, өздерінің бәсекеге қабілетті екендіктерін көрсетулері керек»,-деді атқарушы директор.

Естеріңізге сала кетейік, ҚР Президенті ДСҰ-ға мүшелік қазақстандық экономиканың алдына жаңа көкөжиектердің ашылуына ықпал етіп, біздің кәсіпорындарымызға шетелдік нарықтарға жол ашатындығын, ал тұтынушылар үшін тауарлар мен қызметтердің ауқымының кеңдігіне мүмкіндік тудыратындығын атап өткен болатын.

Ботагөз Айтжанова

Барлық жаңалықтар