Қостанай облысында ағымдағы жылы 256 мың шаршы метр тұрғын үйді пайдалануға беру көзделуде

14 Шілде, 2015 19:16

2015 жылы Қостанай облысында инженерлік-коммуникациялық инфрақұрылымдар мен тұрғын үйлердің құрылысына 3 млрд 729 млн теңге қарастырылды, оның ішінде 1 млрд 399 млн теңге – Ұлттық қордан, 1 млрд 709 млн теңге – республикалық бюджеттен, 621 млн теңге – облыстық бюджеттен бөлінді, деп хабарлады облыс әкімдігінің баспасөз қызметі.

Естеріңізге сала кетейік, 2005 жылдан бері Қостанай облысында барлық қаржыландыру көздері бойынша 1 млн 958 мың шаршы метр тұрғын үй пайдаланылуға берілді. Барлығы 16 мыңнан астам отбасы өздерінің тұрғын үй жағдайларын жақсартты.

Ағымдағы жылы аймақта бюджеттік және бюджеттен тыс қаражат есебінен 256 мың шаршы метр тұрғын үйді пайдаланылуға беру көзделуде, бұл 2014 жылдың деңгейінен 103% құрайды. Облыс бойынша 845 пәтер пайдаланылуға қабылданды, бұл 2014 жылдан 131 пәтерге кем.

2015 жылдың 1 шілдесіндегі жағдай бойынша аймақта мемлекеттік қордан пәтер алуға 23 мыңнан астам адам кезекте тұр, оның 50%-ы Қостанай қаласы әкімдігінде.

Кезекте тұрғандар үшін Қостанай қаласы мен облыс бойынша тұрғын үй құрылысы мен 14 мың шаршы метрден астам жалға берілетін баспаналарды пайдаланылуға беруге 532 млн теңге бөлінді.

Сонымен қатар ағымдағы жылы республикалық бюджеттен 1 млрд 371,9 млн теңге несие ретінде бөлінді. Қомақты қаржы жалпы ауданы 16 мың шаршы метрден асатын тұрғын үйді пайдаланылуға беруге жұмсалатын болады.

Ал, «Нұрлы жол» бағдарламасы аясында 2015 жылы «ҚИК» АҚ-да Қостанай қаласында салушы «БК-Строй»ЖШС-нан 91 пәтерді жеткізу бойынша келісімшарт жасалды.

Барлық жаңалықтар