Қазақстанда енді автобустарға билетті онлайн режимінде сатып алуға болады

14 Шілде, 2015 13:16

«Технологияларды коммерциализациялау» аясында AparuBus бағдарламасы іске қосылды. Аталмыш жүйе бойынша автобус бағыттарына билетті агенттік кассалары арқылы немесе aparubus.kz сайты арқылы үйден шықпастан-ақ сатып алуға болады, деді «Технологияларды коммерциализациялау орталығы» ЖШС Бас директорының орынбасары Айзада Нұрлыбаева Орталық коммуникациялар қызметінде өткен баспасөз мәслихатында.

«2014 жылдың соңында орталық Қазақстандағы автобус бағыттарына электронды билеттер сату бірыңғай жүйесіне енгізуге 18 млн теңге бөлді. Жүйе AparuBus деп аталады. Ол толығымен отандық өнім болып табылады. Бұрындары автобусқа билеттерді тек касса арқылы немесе автотансалардан ғана алуға болатын, бұл ретте билетті қайтатын уақытқа алу мүмкіндігі жоқ еді. AparuBus бағдарламасы бойынша, автобусқа билеттерді арнайы кассалар арқылы немесе үйден-шықпастан-ақ aparubus.kz сайты арқылы сатып алуға болады»,-деді А.Нұрлыбаева.

Оның сөзінше, бұл бағдарлама сол тасымалдаушылардың өздеріне билеттерді сатып, маркетинг саясатын жүргізуге мүмкіндік береді.

«Бүгінгі таңда технологиялардың авторлары электронды рейстер базасын нығайтуда, сондықтан кез-келген тасымалдаушылар мен агенттік кассаларының өкілдері біздің бағдарламаны дайындаушыларға қайырылып, билет сату ісін жеңілдетілген жолмен жүзеге асыра алады»,-деді Бас директордың орынбасары.

Ескерте кетейік, AparuBus жүйесінің мақсаты Қазақстанда автобус бағыттарына билетті сату жүйесін бірыңғайландыру болып табылады.

Анар Тәңірқұлова