Қазақстандық жол құрылысшылары ресейлік әріптестерімен «Батыс Еуропа-Батыс Қытай» көлік дәлізін салу тәжірибелерімен бөлісті
Баспасөз қызметі таратқан мәліметтерге сүйенсек, «Қазавтожол» Ұлттық компаниясы» АҚ-ның өкілдері «Ресей автомобиль жолдары» ресейлік мемлекеттік компаниясының, сондай-ақ Оренбург облысының автожол құрылымы мен Башқұрстан Республикасының өкілдерімен жүздескен. Кездесуге Ресей тарапы мұрындық болды және оның барысында қазақстандық жол құрылысшылары ресейлік әріптестерімен «Батыс Еуропа-Батыс Қытай» көлік дәлізін салу тәжірибелерімен бөлісті.
Халықаралық магистральдің қазақстандық бөлігінде жұмыстар аяқталды, енді, РФ-Оренбург-Казань-Санкт-Петербург шекарасы бағыты бойынша қайта жөндеу жұмыстары жүргізілуі керек. Осыған байланысты, ресейлік жол салушылар «Батыс Еуропа-Батыс Қытай» халықаралық транзит дәлізі» жобасы бойынша салынған Ақтөбе қаласының республикалық бағыттағы жолдарымен және қазақстандық жол салушылардың іс тәжірибелерімен танысты.
Естеріңізге сала кетейік, аталмыш жоба Ақтөбеде Мемлекет басшысы Нұрсұлтан Назарбаевтың тапсырмасымен 2009 жылдың 22-қыркүйегінде басталды. Жоба аясында Ақтөбе облысында халықаралық және республикалық бағыттағы 356 км автожолдар қайта жөнделіп, «Ақтөбені солтүстіктен айналып өту» жаңа автожолы салынды.
