Ақтөбеде қалалық жұмыспен қамту бөлімінің ұйымдастыруымен бос жұмыс орындары жәрмеңкесі өткізілді

14 Шілде, 2015 20:27

«Қалалық жұмыспен қамту және әлеуметтік бағдарламалар бөлімі» ММ ғимаратында Ақтөбе қаласы бойынша 2015 жылы халықты жұмыспен қамтуға арналған Кешенді жоспарына сәйкес мемлекеттік және салалық Бағдарламаларды тиімді және уақытылы орындау мақсатында инфестициялық жобаларды жүзеге асырушы мердігер мекемелердің қатысуымен бос жұмыс орындар жәрмеңкесі өткізілді.

Облыстың ішкі саясат басқармасы хабарлағандай, аталған іс-шара ҚР Президенті Н.Ә. Назарбаевтың «Нұрлы жол-болашаққа бастар жол» атты Қазақстан халқына Жолдауын жүзеге асыру мақсатында ұйымдастырылды.

Бүгінгі күні бос жұмыс орындар жәрмеңкесіне 6 жұмыс берушіден құрылыс саласының мамандықтары бойынша 112 бос жұмыс орындары ұсынылды: прораб, дәнекерлеуші, монтаждаушы, тас қалаушы, сылақшы, электрик, жұмысшы және т.б.

Жәрмеңкеге жұмыссыздар, аз қамтылғандар, өзін-өзі жұмыспен қамтушылар және жұмыс іздеп жүрген барлық азаматтар шақырылды. Жыл басынан бері 6 жәрмеңке өткізіліп, нәтижесінде 135 адам жұмысқа орналастырылды.

2015 жылы мемлекеттік және салалық Бағдарламаларды орындау барысында 642 адамды жұмыспен қамту қарастырылған.

58 азамат жәрмеңкеге катысып, 33 адамға жұмысқа жолдама берілді. Нәтижесі апталық мерзімде белгілі болады.