Ақтөбеде жаңа мемлекеттік бағдарлама бойынша 216 жас отбасы пәтерді иеленді

14 Шілде, 2015 11:28

«Жас отбасыларға арналған баспана» мемлекеттік бағдарламасы бойынша жалға берілетін пәтерлерді иеленуге құқылы 216 отбасы өз пәтерлерінің нөмірлерін білді, деп хабарлады Облыстың ішкі саясат басқармасы.

Өткен жылы аталмыш жаңа мемлекеттік бағдарлама бойынша алғаш рет «Нұр Ақтөбе» тұрғын үй алқабынан 216 жас отбасы пәтер алған. Бұл келесі толқын. Жас отбасылар «Нұр Ақтөбе» шағынауданындағы 9 қабатты 216 пәтерлі тұрғын үйге қоныстануда.

«Бағдарламаға 921 жас отбасы қатысты, көбірек балл жинағандары «Тұрғын үй құрылыс жинақ банкіне» төлем қабілеттілігін тексеру үшін жіберілді. Өз төлем қабілетін растамаған азаматтардың орнына банкке тізім бойынша келесі үміткерлер жіберілді. Қазір үй пайдалануға берілді, инженерлік жұмыстар жүргізілуде», - деп хабарлады ТКШ, жолаушылар көлігі, автожол бөлімінің тұрғын үй қоры секторының меңгерушісі Жанаргүл Дүйсекенова.

Пәтер бөлу лототрон арқылы ашық түрде өтті. Жалпы, жиналысқа үйге қоныстанатын тұрғындар қатысты.

28 шілдеде пәтер кілттері табыс етіледі. Тамыз айының басында «Жас отбасыларға арналған баспана» бағдарламасы бойынша тағы бір үйден пәтерлер алуға өтінімдер қабылданатын болады. Бұл жолы көбірек, яғни 234 өтініш қабылданады.

Барлық жаңалықтар