ТҮРКСОЙ жастардың камералық хоры II Еуропа хор ойындарында алтын медальды жеңіп алды

13 Шілде, 2015 15:32

Магдебургте (Германия) өткен Еуропалық хор ойындарында Жастардың ТҮРКСОЙ камералық хоры «Рухани музыка» аталымы бойынша алтын медальды жеңіп алды, деп хабарлайды Мәдениет және спорт министрлігінің баспасөз қызметі.

Хордың жетекшісі хормейстер, Астана Мемлекеттік филармониясының Камералық хорының көркемдік жетекшісі Гүлмира Құттықадамова.

Байқау барысында Түрік мәдениеті халықаралық ұйымының Жастар хоры Моцарт, Антонио Лотти, Юзеф Свидердің шығармалары мен әйгілі қазақ композиторы Еркеғали Рахмадиевтың «Хорал» туындыларын орындады. Қазақстанның түркі әлемінің шығармашылық ұжымында «Астана Опера» мен Астана қаласының Мемлекеттік филармониясының әртістері бар.

Биылғы жылы әділқазылар алқасына 7 мемлекеттің хор өнерінің белді шеберлері мүше болды. Айта кететін мәселе, еуропалық хор ойындарында әлемнің 35 мемлекетінің 100 хор ұжымы 10 аталым бойынша бәсекеге түсуде.

Естеріңізге сала кетейік, ТҮРКСОЙ Жастар хоры Әзірбайжан, Қазақстан, Қырғызстан, Түркия, Татарстан консерваторияларының студенттерінен құрылған. Мұндай хорды құру шешімі Казань қаласында өткен жылдың қараша айында өткен ТҮРКСОЙ-дың Мәдениет министрлерінің Тұрақты кеңесінің 32-ші мәжілісінде қабылданған болатын.

Барлық жаңалықтар