Қазақстан Египет өкілін Конституцияның 20 жылдығына арналған конференцияға шақырды

11 Шілде, 2015 12:34

Каирде Қазақстанның Еипеттегі елшісі Берік Арын мен Египет Араб Республикасының Жоғары Конституциялық сотының төрағасы Адли Мансұрмен кездесу ұйымдастырылып, оның барысында Египет тарапына ҚР Конституциясының 20 жылдығына арналған конференцияға шақыру тапсырылды, деп хабарлайды СІМ.

Елші А.Мансұрға Жоғарғы сот төрағасы Қайрат Мәми мен Конституциялық Кеңес төрағасы Игорь Роговтың 2015 жылдың тамыз айында Астанада өтетін ҚР Конституциясының 20 жылдығына арналған халықаралық конференцияға бірлескен шақыруын тапсырды. Елші сонымен қатар, Египет өкілін Қазақстанның ішкі саяси өміріндегі осы уақытта болып жатқан маңызды мәселелермен, соның ішінде ҚР Президенті Нұрсұлтан Назарбаевтың «Нұрлы жол», 5 институционалды реформаны жүзеге асыруға бағытталған «100 нақты қадам» бағдарламалары мен елде атап өтіп жатқан Қазақ хандығының 550 жылдығына арналған мерекелік шараларымен таныстырды.

Египеттің Жоғарғы Конституциялық сотының төрағасы шақыруды қабыл алып, Қазақстан үшін маңызды болып табылатын аталмыш шараға қатысу үшін барлық мүмкіндіктерді қарастыратындығын айтты. Ол ҚР Президентінің мемлекетті тұрақты дамытуға бағытталған салиқалы саясатын жоғары бағалап, екі ел арасындағы ынтымақтастықтың алдағы уақытта одан әрі нығая түсетіндігінен үміттенетіндігін білдірді.

Тараптар сонымен қатар, сот және өзге де салалар бойынша, екіжақты ынтымақтастықты дамыту жолдары жөнінде өзара пікір алмасты.