ШҚО-да футбол академиясын құру жоспарлануда

10 Шілде, 2015 19:32

Өскеменге испандық мамандарды, соның ішінде «Реал Мадрид» футбол академиясының клубын тарту арқылы футбол мектептерін ашу мен дамытуға маманданған «Soxna» компаниясының өкілдері келді, деп хабарлады Шығыс Қазақстан облысы әкімдігінің баспасөз қызметі.

Облыс әкімі Даниал Ахметов «Soxna» компаниясының президенті Алсин Луиспен кездесу өткізді. Кездесу барысында олардың Өскеменде Футбол академиясын ашу жайлы ұсынысы талқыланды.

«Өскемендегі қазіргі база 300 орындық футбол академиясын ашуға мүмкіндік береді. Егер жұмыстың бірінші жылынан кейін нәтиже болатын болса, академияны үлкейту мәселесін қарастыратын боламыз. Ұсыныстарыңыздың құрылымы мен жоба құнын, футбол академиясын ұйымдастыру бойынша шаралар жоспары жөніндегі ұсыныстарыңызды дайындауыңызды сұраймын. Солармен танысқаннан кейін нақты шешім қабылдаймыз»,- деді өңір басшысы.

Даниал Ахметов балаларды іріктеуде олардың физикалық дайндығы мен ойнау техникасы бойынша нақты критерийлер дайындауды, балалармен жұмыс жасауға қажет испандық және қазақстандық мамандардың санын көрсетулерін айтты. Ол сондай-ақ, академия үшін арнайы футбол манежі салынатынын атап өтті.

Барлық жаңалықтар