Қазатомөнеркәсіп пен ОҚО әкімдігі жергілікті қамтуды дамыту бойынша 4,6 млрд теңгенің келісіміне қол қойды

9 Шілде, 2015 15:21

«Қазатомөнеркәсіп» ҰАК» АҚ және Оңтүстік Қазақстан облысы әкімдігі отандық тауар өндірушілерді қолдауға келісті. Ұлттық атом компаниясы басшысының өңірге жасаған жұмыс сапары барысында тиісті келісімге қол жеткізілді.

««Қазатомөнеркәсіп» ҰАК» АҚ басқарма төрағасы Асқар Жұмағалиев пен Оңтүстік Қазақстан облысының әкімі Асқар Мырзахметов компания мен әкімдік арасындағы ынтымақтастық туралы меморандумға қосымша ретіндегі жергілікті үлесті дамыту мәселелері жөніндегі келісімге қол қойды. Аталмыш құжат аясында уран өндіруші кәсіпорындар өңірдегі отандық тауар өндірушілермен жалпы сомасы 4,6 млрд теңгені құрайтын келісімдер жасауға ниетті», - деп хабарлады ОҚО әкімдігі.

2015-2016 жылдары ұлттық атом компаниясы жергілікті кәсіпкерлерден электротехникалық жабдықтар (трансформаторлар), жанар-жағармайлар, арнайы киімдер, құбырлар, қағаз бұйымдар, т.т. сатып алатын болады.

«Келісімді іске асыру өңірдің әлеуметтік-экономикалық дамуына мультипликативтік нәтиже бермек – жергілікті қамтудың үлесі өседі, жұмыс орындары сақталады, өнімдердің бәсекеге қабілеттілігі артады», - делінген хабарламада.

Ұлттық атом компаниясының басшысы сондай-ақ, Оңтүстік Қазақстан облысының Таукент және Қыземшек кенттеріндегі «Қазатомөнеркәсіп-Демеу» ЖШС-не қарасты әлеуметтік нысандарды аралауды жоспарлаған.

Барлық жаңалықтар