ШҚО-да концессионерлердің қатысуымен 11 балабақша салынады
ШҚО-да мемлекеттік-жеке серіктестік пен өзге де концессиондық жобаларды дайындау аясында Өскемен мен Семей қалаларында балабақшалар салу мен оларды пайдалану бойынша конкурстар аяқталды.
Мектепке дейінгі тәлім-тәрбие беру мен оқыту нысандарындағы орындарға деген зәрулікті жою мақсатында өңірдің негізгі екі қаласында концессионерлердің қатысуымен 11 балабақша салынады. Облыс орталығында – 6, Семейде - 5 балабақша салынбақ. Аталмыш жобалар 2015-2016 жылдар аралығында жүзеге асырылады. Концессия мерзімі 20 жыл.
Жақында күндерде конкурс аяқталып, оның жеңімпаздары балабақшаларды салып, оларды 7 жыл бойынша жеке меншік ретінде пайдаланады. Бұдан соң олар 12 жылға мемлекет меншігіне беріледі. Концессионерге уақытша пайдалануға жер беру, инженерлік коммуникацияларды жүргізу, концессионердің инвестициялық шығындарын 100 пайыз қайтару мен мемлекеттік тапсырыс беру сияқты жеңілдіктер жасалады.
Облыс әкімі Даниал Ахметов Өскеменде 300 орынға арналған көпсалалы аурухана мен Семейдегі 200 орындық балалар ауруханасының конкурстық құжаттарын дайындауды тапсырды. Аталған құрылыстар да мемлекеттік жеке меншік серіктестігі аясында жүзеге асырылады.
