Қазақстан Кариб қоғамдастығына мүше мемлекеттермен сауда саласы бойынша тығыз қарым-қатынас орнатуда

8 Шілде, 2015 13:42

Бриджтаун қаласында (Барбадос) Қазақстанның Канададағы елшісі мен Кариб қоғамдастығына мүше мемлекеттердің өкілі Константин Жигалов бастаған еліміздің ресми делегациясы Кариб қоғамдастығына мүше мемлекеттердің Үкімет басшыларының 36-шы мәжілісіне қатысты, деп хабарлайды Сыртқы істер министрлігінің баспасөз қызметі.

Саммиттің басты тақырыптары өңірлік және халықаралық ынтымақтастық, экономикалық даму, жаңғыртылатын энергия, қоршаған ортаны қорғау сияқты салалар болды. Жиын барысында К.Жигалов жиналғандарға Қазақстанның Кариб қоғамдастығына мүше мемлекеттермен сауда, инвестиция, туризм, энергетика және мәдениет салалары бойынша тығыз қарым-қатынас орнатуға мүдделі екендігін жеткізді. Астанада өтетін ЭКСПО-2017 халықаралық мамандандырылған көрмесіне қатысты мәселелер де сөз болды. Кариб көшбасшыларының сөздерінше, жаңғыртылатын энергия мен «болашақ энергиясы» олардың мемлекеттері үшін ерекше өзекті болып отыр. Олар Астанада 2014 жылы ЭКСПО-ға қатысты кариб елдеріне арнайы өткізілген «Caribbean Future Energy» арнайы семинары үшін алғыстарын білдірді. К.Жигалов Кариб мемлекеттерінің өкілдерін ЭКСПО көрмесіне белсенді қатысуға шақырды.

Саммитке қатысушылардың қызығушылығын әсіресе ҚР Президенті көтерген «100 нақты қадам» бағдарламасы тудырды. Сондай-ақ Кариб көшбасшылары Қазақстандағы экономикалық жоспарлау, индустриялды артараптандыру, әлеуметтік даму бағытындағы бағдарламаларын терең зерттегілері келетіндіктерін білдірді.

Барлық жаңалықтар