«Қазақстан Барысы-2015» жеңімпазына ҚР Президентінің төс белгісі табысталды

7 Шілде, 2015 16:27

Қазақстан Республикасының Президенті Н.Назарбаевтың тапсырмасы бойынша мәдениет және спорт министрі А.Мұхамедиұлы «Қазақстан барысы» Республикалық турнирінің V маусымының жеңімпазы Б.Ыстыбаевты ҚР Президентінің төс белгісімен марапаттады, деп хабарлады ведомствоның баспасөз қызметінен.

А. Мухамедиұлы Б.Ыстыбаевтың турнирде өз шеберлігін ғана емес, алға жылжуға деген құштарлығын да көрсетті деп атап өтті.

«Астана күні қарсаңында өткен «Қазақстан Барысы-2015» турнирінде мемлекет басшысының Бейбіт Ыстыбаевқа гран-при табыстағаны бізді қуантады. Елбасымыз үнемі Қазақстанның болашаққа сенімді қадам басатын зияткерлік ел болуы керектігін айтып келеді. Ол үшін жастардың спортпен, мәдениетпен айналысуы, рухани бай болуы маңызды екені айтылады. Сол кезде мемлекетіміз «Мәңгілік ел» деген атымызға сай болады», - деді А.Мұхамедиұлы.

Еске салсақ, 4 шілдеде Бейбіт Ыстыбаев ақтық сында қызылордалық Руслан Әбдіразақовтан басым түсіп, турнирдің екі дүркін жеңімпазы атанды. Жеңімпазға 150 мың доллар көлемінде сыйлық, чемпионат белбеуі, автокөлік және «Тайтұяқ» трофейі табысталды.

Барлық жаңалықтар