Мембасқару академиясы ЭЫДҰ басқару мектебінің ғаламдық желісіне кірді

Шараның басты тақырыбы «Әлемдік деңгейдегі мемқызметке арналған қабілет». Жиында сондай-ақ, мемлекеттік қызметті жаңарту, мемлекеттік реформаларды іске асырудың халықаралық тәжірибесі, мемлекеттік қызметкерлерді оқып-үйретудің технологиясы мен әдістерін жетілдіру, аталмыш салада инновацияны дамытудағы ЭЫДҰ рөлі  секілді маңызды мәселелер қозғалды.

Академия ректоры Б.Әбідрасілов «Басқару мектептері әлемдік деңгейдегі мемлекеттік қызметті қалыптастырудың әріптестері ретінде» тақырыбындағы баяндамасын оқыды. Ол баяндамасында академияның оқу-әдістемелік және ғылыми қызметін жаңғырту тәжірибесімен, атап айтсақ, біліктілік негізінде мемқызметкерлерді оқытудың жаңа тәжірибелі бағдарлық бағдарламаларын әзірлеу, меморгандардың қызметін жетілдіруге бағытталған заманауи ғылыми зерттеулерді ұйымдастыру турасындағы тәжірибелерімен бөлісті. Сонымен қатар президент Н.Назарбаевтың «100 қадам» бағдарламасы аясында жоғары білікті, автономды мемлекеттік аппаратты қалыптастыру бойынша елімізде атқарылып жатқан шаралар туралы мәлімет те жиналғандардың қызығушылығын тудырды.

Аталмыш шарада академия ресми түрде ЭЫДҰ басқару мектебінің Ғаламдық желісінің мүшесі болып қабылданды. Аталмыш ұйымға мүше болу мемқызметкерлерді үздік еуропалық стандарттар деңгейіне дейін оқыту әдістемесін жетілдіруге ықпал ететін болады.