Астанада қала күніне орай рекордтық мөлшерде қазақша ет дайындалды
5 Шілде, 2015 18:31
Ертең елордада «Ғашықтар» саябағында Астана күніне және Қазақстан халқының Ассамблеясының 20 жылдығына арналған Гиннестің рекордтар Кітабына енетін 700кг салмақ тартатын ет тағамын дайындайтын кең ауқымды «Тайқазан» акция өткізілмек.
Әкімдіктің хабарлауынша, іс-шара барысында дәстүрлі қазақ тағам дайындау әдісі бойынша 15 қазанда және барлық ет сыятын үлкен тайқазанда қазақша ет дайындау жоспарлануда.
«Тағам дайындауда рекордтық 700 кг ет пайдаланылады. Ет пен қамыр бөлек қазандарда пісіріледі. Айта кетерлік жайт, қамыр қолмен иленіп жайылады. Сонымен қатар, дайын ас арнайы тайқазанға салынып таразыға тартылады», - делінген хабарламада.
Аталып өткендей, көрсеткішті белгілеу үшін Лондондағы Гиннес рекордтар Кітабының штаб- пәтерінен арнайы супервайзер шақырылған.
Аста-төк ет барлық келушілерге таратылады. Жоспарланғандай, бұл тағамнан 3500-ден астам адам дәм татады.
