Вице-премьер Б. Сапарбаев Текелі моноқаласының әлеуметтік нысандардың даму барысымен танысты (ФОТО)
Қарттар мен мүгедектер үйіне атбасын тіреп, мекеменің қызметін, тұрмыстық жағдайын көрді. Мұнан соң Бердібек Сапарбаев «Моноқалаларды дамытудың 2012-2020 жылдарға арналған бағдарламасы» шеңберінде қайта жаңғыртылған балалар мен жасөспірімдердің туристік және өлкетану орталығында болды.
Вице-премьер атап өткендей, Текеліде аталмыш бағдарлама сәтті жүзеге асырылуда.
«Жалпы республика бойынша Текелі секілді шағын қалаларды сақтап қалу және одан әрі дамыту мақсатында Елбасының тапсырмасымен моноқалалар бағдарламасы жасалып, бүгінгі күні бұл бағдарламаға осындай 27 қала енгізілген. Олар қазір бағдарлама аясында мемлекет көрсеткен қолдаулардың арқасында өркендеп, өсіп келеді. Текелі тұрғындарының саны бұрынғымен салыстырғанда артып, бүгінгі күні 31 мыңнан асыпты. Халық санының көбеюі - бұл жергілікті жердегі тұрмыстың түзелгенін, жағдайдың жақсарғанын, жаңа жобалар қолға алынып, жаңа жұмыс орындары ашылып жатқанын айғақтайды. Сондықтан алдағы уақытта да шағын және орта бизнесті одан әрі дамыту жұмыстарын жалғастыра беру керек», - деді Б. Сапарбаев.
Сапар соңында Бердібек Сапарбаев Текелі қаласының тұрғындарымен, кәсіпкерлермен және әлеуметтік сала қызметкерлерімен орталық қалалық саябақта кездесіп, әңгімелесті, делінген хабарламада.
