2018 жылға дейін ТКМК дамыту үшін 7 млрд долларға 27 инвестициялық жобаны жүзеге асыру қарастырылған -А.Рау

«ҮИИДМБ табысты аяқтадық, мұны Елбасының берген жоғары бағасы мен нақты сандар, жүзеге асырылған жобалар дәлелдейді. Біз екінші бесжылдықты табысты жүзеге асырудың іргетасын қаладық. ИИДМБ ауқымы 6 салаға дейін қысқартылды. Түрлі түсті және қара металлургия  олар еліміз үшін басымдылық берілген екі басты сала болып қала бермек», - деді А.Рау Астанадағы  Тау-кен металлургияның VI-шы халықаралық конгресі барысында.

Вице-министрдің айтуынша, саланы дамыту бойынша міндеттер мен жаңа мақсаттар түзетілетін болады.

«Елбасының тапсырмасы бойынша 2014-2018 жылдар аралығында тау-кен металлургия кешенін дамыту жоспары жасақталды. Шикізатсыз қара, я болмаса түрлі-түсті металлургия дамымайды. Жоспар металлургияның шикізат базасын алдын-ала дамытуға бағытталған.  Нормативті құқықтық базаны және жер қойнауын пайдалану құқығын беру жүйесін жетілдіру, геологиялық барлау жұмыстарын дамыту, инвестициялық жобаларды жүзеге асыру мен халықаралық серіктестік қарастырылған. Жоспарды ҚР Үкіметі бекітті және осы жылдан бастап жүзеге асыра бастады», - деп атап өтті А.Рау.

Оның айтуынша, жоспарда 7 млрд долларға 27 инвестициялық жобаны жүзеге асыру қарастырылған, олар 2014-2018 жылдар аралығында тау-кен металлургия кешенін дамыту жоспары аясында кәсіпорындардың өздері қарызға алған қаржысына жүзеге асырылады

Ботагөз Айтжанова