Қ. Тоқаев: Қазақстан мен Беларусь парламентшілері ТМД, ҰҚШҰ парламентаралық ассамблеялары аясында ынтымақтастық жүргізуде
Қ.Тоқаевтың пікірінше, Беларусь парламентшілерінің сапары екі ел арасындағы одақтастық қарым-қатынастарды одан әрі дамытуға ықпал етеді. Сенат Төрағасы Қазақстан халқы Ассамблеясының 20 жылдығына арналған халықаралық конференцияға қатысқаны, форумда Қазақстанға және Мемлекет басшысы Нұрсұлтан Назарбаевтың атына білдірген ыстық ықыласы үшін беларусьтік әріптесіне ризашылық білдірді. Сенат Төрағасы Елбасы ұсынған бес институттық реформалар негізінде Қазақстан іргелі өзгерістер қарсаңында тұрғанын атап өтті.
«Қ.Тоқаев Қазақстан мен Беларусь парламентшілері екіжақты деңгейде ғана емес, сондай-ақ ТМД, ҰҚШҰ және басқа да ұйымдардың парламентаралық ассамблеялары аясында жемісті іс-қимыл жүзеге асып келе жатқанын ықыласпен атап өтті. Сондай-ақ, Еуразиялық экономикалық комиссияның қызметі де депутаттар тарапынан тиісті қолдауды талап етеді», - делінген хабарламада.
Өз кезегінде, В.Андрейченко Беларусь Қазақстанның жетістіктерін жоғары бағалайтынын және еліміздің халықаралық аренадағы беделі арта түскеніне қуанышты екенін атап өтті. Мәртебелі мейман парламентаралық ынтымақтастықты одан әрі тереңдету, сондай-ақ екі елдің өңірлері арасындағы байланыстарды өрістету туралы ойларын ортаға салды. Осыған байланысты, Беларусь Парламентінің Өкілдер палатасының төрағасы жергілікті өзін-өзі басқару мен жергілікті жерлердегі өкiлдi және атқарушы органдар қызметінің тиімділігін арттыруға бағытталған Беларусь реформалары туралы әңгімеледі.
