ӘҚК ӘИ курсанттары тағылымдама аясында 15 сағаттан ұшулары керек – ҚР ҚМ

18 Маусым, 2015 08:54

Ақтөбе облысының Хлебодаровка далалық әуеайлағында Кеңес Одағының екі мәрте батыры Талғат Бигелдинов атындағы Әуе қорғанысы күштері Әскери институтының 3-ші және 4-курс курсанттарының ұшу тағылымдамасы басталып кетті, деп хабарлады Қорғаныс министрлігі.

Болашақ авиаторлардың әрқайсысы 15 сағаттан ұшуы тиіс. Одан басқа, ұшу даярлығының жоспарына міндетті парашюттен секіру кіреді. Дайындыққа барлығы 24 курсант тартылды.

Болашақ авиаторлар ұшулар қауіпсіздігі қызметінің тәжірибелі әдіскер-нұсқаушылары подполковник Владимир Семенов пен майор Влад Капаролиннің басшылық етуімен оқу материалын меңгереді. Оқу-ұшу даярлығының бағдарламасына практикалық және саптық дайындық, сондай-ақ Ми-8 тікұшағымен ұшу жаттығуы кіреді.

Айта кетейік, курсанттардың ұшу тағылымдамасы екінші курстан басталып, жыл сайын өткізіледі. Оқуды аяқтау қарсаңында курсанттар 80 сағаттан астам ұшу дайындығын жүргізеді. Оның барысында курсанттарға іс жүзінде институт қабырғасында алған теориялық білімдерін қолдану қажет. Ұшулар басталғанға дейін барлық курсанттар жерүсті даярлық курсы бойынша сынақтарды сәтті тапсыруы тиіс. ӘҚК ӘИ 3-курс курсанттарының ұшу даярлығы 26 шілдеде, 4-курс үшін 13 қыркүйекте аяқталады.

Барлық жаңалықтар