Б. Сапарбаев: Өткен жылы түлектерді жұмысқа орналастыру деңгейі 72% құрады

17 Маусым, 2015 13:38

Өткен жылы түлектердің 72%-ы жұмысқа орналастырылды, деп мәлімдеді ҚР Премьер-Министрінің орынбасары Бердібек Сапарбаев ҚР Парламенті Палаталарының бірлескен отырысында.

«Экономикадағы мамандарға деген сұраныс тұтыну көлеміне, мемлекеттік бағдарламалардың жүзеге асырылуына, құрылыс нысандарына тәуелді. Оқу орындары негізінде біз келісілген тұрғыда мамандарды даярлаумен айналысамыз. Статистикалық мәліметтерге сәйкес өткен жылы түлектерді жұмысқа орналастыру деңгейі 72% құрады», - деді Б.Сапарбаев.

Сапарбаев атап өткендей, индустрияландыру бағдарламасы үшін мамандарды даярлауға бөлінген қаржы - 10 млрд теңге жаңа ғылыми-зерттеу зертханаларын ашуға, жаңа мамандарды дайындауға жұмсалады.

«Үшінші жыл қатарынан экономика, заң мамандықтары бойынша студенттерді оқытуды қысқартудамыз», - деп атап өтті вице-премьер.

Ол еске сала кеткендей, кәсіби техникалық білім беру саласында бесінші жыл қатарынан дуалды білім беру жүйесі жұмыс істеп келеді.

Б. Сапарбаев толықтырып кеткендей, түлектердің жұмысқа орналасу пайызы Зейнетақы төлеу бойынша мемлекеттік орталықтың анытамасы негізінде есептеледі.

Индира Кауметова