«Каспий теңізі – 2015» байқауына қатысу үшін Қазақстан Әскери-теңіз күштерінен негізгі корабль айқындалды (Фото)

17 Маусым, 2015 20:42

ҚР ҚК Әскери-теңіз күштерінің «Орал» және «Сарыарқа» зымыран-артиллериялық корабльдері ҚР ҚК ӘТК Бас штабының бастығы полковник Қайыргелді Есенеевтің басшылық етуімен бекітілген даярлық жоспарын пысықтау үшін теңізге шықты, деп хабарлады Қорғаныс министрлігі.

Теңізге шығу кезінде «Каспий теңізі – 2015» (теңіз биатлоны) халықаралық сайыстарына қатысу үшін негізгі және қосалқы корабль анықталды. Жорық қорытындысы бойынша ҚР ҚК Әскери-теңіз күштерінің қолбасшылығымен байқауға қатысу үшін негізгі корабль болып «Сарыарқа» зымыран-артиллериялық кораблі белгіленсе (корабль командирі – капитан-лейтенант Рустам Жүнісов), «Орал» кораблі (корабль командирі – капитан-лейтенант Қайрат Шаршанқұлов) резервтік деп айқындалды.

Қазақстандық зымыран-артиллериялық корабльдердің экипаждары «Каспий теңізі – 2015» теңіз биатлонына дайындалып жатқанын еске салайық.

Әскери теңізшілер жаңа және навигациялық қауіп-қатер маңында жүзуді пысықтайды, 30-40 метрге кемені зәкірге қоюды, МСС-65 белгілерінің халықаралық жинағына сәйкес жарықтық және жалаушалы семаформен белгілерді беру және алуды, сондай-ақ суға құтқарушыны жіберу әдісімен борттың ар жағында қалған адамды құтқаруды іс жүзінде орындайды. «Каспий теңізі – 2015» – бұл каспий маңы елдері Әскери-теңіз күштерінің алғашқы сайысы. Ол осы жазда Каспий теңізі айдынында өтетін болады.

Барлық жаңалықтар