Б.Сағынтаев «Нұрлы жол» мембағдарламасының іс-шаралар жоспарының атқарылуы бойынша мәжіліс өткізді
Бағдарлама аясында еліміздің ішкі нарығын кеңейтуге, транзиттік және экспорттық әлеуетті арттыруға, сондай-ақ инфрақұрылымды дамытуға бағытталған басымдықты жобалар жүзеге асырылады.
Қазіргі уақытта құрылыс жұмыстары «Батыс Еуропа - Батыс Қытай», Астана-Алматы, Астана-Өскемен, Қызылорда-Жезқазған-Қарағанды, Астана-Ақтөбе-Ақтау, Алматы-Өскемен тас жолдарында жүріп жатыр. Темір жол және көліктік логистика саласындағы жобалар бойынша жұмыс жүргізілуде. Атап айтқанда, Алматы 1 - Шу темір жол бөлігінде екінші жолдардың құрылысына арнап топо-геодезиялық және инженерлік-геологиялық іздеулер жүргізілуде, Боржақты - Ерсай желісінің құрылысы жүргізілуде, Құрық портында паром өткелін салу жобасы бойынша мемлекеттік сараптаманың қорытындысы алынды, геодезиялық және инженерлік-геологиялық іздеулер жүргізіліп жатыр. Астана қаласы әуежайының ұшу-қону жолағы мен терминалын жөндеу бойынша жұмыс жүргізілуде.
Қазақстандағы АЭА мен индустриалдық парктерді дамытуға, тұрғын үйлер, мектептер мен балабақшалар құрылысына, келушілер және ішкі туризмді одан әрі дамытуға инфрақұрылым құруға, АӨК субъектілерін, отандық автокөліктер, тікұшақтар, жолаушылар вагондарын өндірушілерді қолдауға бағытталған қаражат игерілуде.
Кеңес қорытындысы бойынша Бақытжан Сағынтаев министрліктерге, облыстар, Астана мен Алматы қалаларының әкімдеріне қарқынды бәсеңдетпей, «Нұрлы жол» инфрақұрылымды дамытудың 2015-2019 жылдарға арналған бағдарламасын іске асыру бойынша іс-шаралар жоспарын уақтылы орындауды қамтамасыз етуді, сондай-ақ ведомствоаралық өзара іс-қимыл мен қаражаттың тиімді игерілуіне бақылауды күшейтуді тапсырды.
