ҚР СІМ-де испан тілі курстарының тыңдаушыларына сертификаттарды табыстау рәсімі өтті (Фото)
16 Маусым, 2015 17:26
ҚР СІМ-де министрліктің жауапты хатшысы Анарбек Қарашев және Колумбияның Мәскеудегі Елшілігінің кеңесші-уәкілі Клаудиа Замбраноның қатысуымен испан тілінің 6 айлық курсын сәтті аяқтаған СІМ қызметкерлері мен ҚР Президентінің жанындағы Мемлекеттік басқару академиясы Дипломатия институтының тыңдаушыларына испан тілін оқығаны туралы сертификаттарды табыстау рәсімі өтті.
Аталған курстар ҚР СІМ, ҚР Президентінің жанындағы Академия және Колумбияның СІМ арасында қол қойылған Астанада испан тілі курстарын өткізу туралы келісімге сәйкес ұйымдастырылды, деп хабарлады ведомство.
А. Қарашев сертификаттарды табыстау рәсімінде испан тілі оқытушысын жолдағаны үшін колумбиялық тарапқа алғыс айтып, еліміздің дипломатиялық қатынасының кеңеюін және Қазақстанның шет елдердегі жаңа мекемелерінің ашылуын ескере отырып, испан тілін меңгерген мамандарды дайындаудың маңыздылығын атап өтті.
