ҚР ҚК ҚӘ Аэроұтқыр әскерлерінің 200 әскери қызметшісі әскери даярлықтарын шыңдауда

16 Маусым, 2015 20:43

Алматы облысының Талдықорған қаласында 18404 әскери бөлімінің базасында ҚР ҚК Аэроұтқыр әскерлерінің жедел-әдістемелік жиындары басталды, деп хабарлады ҚР Қорғаныс министрлігі.

Жиынға ҚР ҚК ҚӘ Аэроұтқыр әскерлері басшылық құрамының 200-ден астам әскери қызметшісі қатысады. Жиынға қатысушылар әскери дайындықтың, әскери және құқықтық тәртіптің негізгі бағыттарын шыңдайтын болады.

Одан басқа, атыс даярлығы, арнайы дайындық – атыс артиллериясының дәлдігін пысықтау, зымыран-артиллериялық қару-жарақ қоймаларына қойылатын талаптар, оқ-дәрілердің эшелондау тәртібі бойынша топтар құрамында сабақтар өтеді. Техникалық даярлық аясында қару-жарақты, әскери техника мен автомобильдерді жөндеу бөлімшелерімен тактикалық-арнайы оқу-жаттығулар өткізіледі.

Тәрбие және әлеуметтік-құқықтық жұмыстар бойынша сабақтарда жауынгерлік әзірліктің жоғары дәрежесіне келтіру кезінде және марш жасау барысында арнайы операцияларда әскери қызметшілердің моральдық-психологиялық қасиеттерін ұйымдастыру жөніндегі дағдылар жетілдіріледі.

Өткен аптада Гвардейск кентіндегі «Отар» 40-шы әскери базасында ҚР ҚК Құрлық әскерлері басшылық құрамының жедел-әдістемелік жиындары аяқталғанын еске сала кетейік. Әскери қызметшілер жауынгерлік әзірлікті жетілдірудің өзекті мәселелерін талқылап, әскерлердің жауынгерлік даярлығының жаңа үлгілері мен құралдарын қарастырды. Мұнда 2015 жылғы бірінші жартыжылдықтың қорытындысы шығарылды.

Барлық жаңалықтар