500 жаңадан шақырылған сарбаз ҚР ҚК Әуе қорғанысы күштері бөлімін толықтырды (Фото)

ҚР ҚК Әуе қорғанысы күштерінің 97617 (Алматы облысының Первомайка кенті), 20709 (Алматы облысының Жетіген кенті), 97616 (Шығыс Қазақстан облысының Аягөз қаласы), 97638 (Шығыс Қазақстан облысының Серебрянск қаласы) әскери бөлімдерінде әскери ант қабылдау салтанатты рәсімі өтті.

Бұл күні осы көктемде ҚР ҚК Әуе қорғанысы күштері Әуе шабуылына қарсы қорғаныс әскерлеріне мерзімді қызметке шақырылған 500-ге жуық бозбала салтанатты түрде әскери ант қабылдады.

 «ҚР Қарулы Күштерінің қатарына кірген Қазақстан Республикасының азаматы Отанға, халқына және ҚР Президентіне ант беруі тиіс. Бүгін сендер осынау үлкен жауапкершілікті мойындарыңа алып, еліміздің батыл қорғаушылары болуға ант бердіңдер. Ер азамат үшін ант қабылдау өміріндегі мәңгі есте қаларлық күн.  Отанымыздың рухты, қайсарлы Отан қорғаушылары болып, ата-аналарыңыз бен туған-туысқандарыңыздың үкілеген үмітін ақтаңыздар». – деді сөз соңында ҚР ҚК ӘҚК Әуе шабуылына қарсы қорғаныс әскерлерінің қолбасшысы генерал-майор Нұржан Мұқанов.

Жас сарбаздарды 97617 әскери бөлімінің командирі полковник С.Телегенов, ҚР ҚК ӘҚК Әуе шабуылына қарсы қорғаныс әскерлерінің ардагерлер одағының мүшелері запастағы полковник М.Раджибаев, полковник Д.Кулик, Ауған соғысы ардагерлері одағының бастығы А. Амраев, сондай-ақ жас сарбаздардың ата-аналары құттықтады. 

Осы сәттен бастап жастар Қазақстан Қарулы Күштерінің қатарына ресми түрде қабылданды. Олар өздерінің туысқандарымен бір жылға қоштасып, алғаш рет бірыңғай саппен әскери бөлімнің алаңқайын адымдап өтті. Енді жігіттер күрделі әскери ғылымның қыр-сырын меңгеретін болады.  Бір жылғы мерзімді қызметтен кейін бүгінгі сарбаздар келісімшарт бойынша әскери қызметшілер ретінде қазақстандық армия қатарын толықтыра алады.