Алматы гарнизонының әскери қызметшілері салтанатты түрде Жеңіс Туын қабылдады (Фото)
«Генералдар кеңесі» республикалық қоғамдық бірлестік Президиумының төрағасы генерал-майор Рүстем Қайдаров әскери рәсімді сақтай отырып, Алматы өңірлік гарнизонының бастығы генерал-майор Дәулет Оспановқа Жеңіс туын табыстады.
«Жеңіс туының көшірмесін қабылдау біз үшін үлкен абырой және құрмет. Біз бұл туды көздің қарашығындай сақтап, келер ұрпаққа табыс ететін боламыз», - деді өз сөзінде Дәулет Оспанов. Туды табыс ету рәсімі Алматы гарнизоны әскери бөлімдерінің әскери қызметшілері, әскери оқу орындарының курсанттары, ҚР ҚК ардагерлері мен қала тұрғындарының қатысуымен өтті.
Салтанатты іс-шарадан кейін әскери қызметшілер мәңгі алауға гүл шоқтарын қойып, Ұлы Отан соғысында қаза болған жауынгерлер рухына бір минут үнсіз тұрып тағзым етті. Жеңіс туының түпнұсқасы Ресей Федерациясы Қарулы Күштерінің Орталық мұражайында сақтаулы тұрғанын айта кетейік.
